Y Côr
Ffurfiwyd Côr Bach Abertawe ym 1965 gyda'r nod penodol o gyflwyno gweithiau corawl gorau'r pum canrif diwethaf, i gynulleidfa mor eang â phosib, mewn dull mor broffesiynol a dilys â phosib. Mae llawer o'r deugain aelod yn gantorion hyfforddedig ac yn athrawon cerddoriaeth.
Mae'r côr yn enwog am ei berfformiadau o gerddoriaeth Faróc, yn enwedig gweithiau mwyaf Bach. Ei berfformiad o'r Matthäus-Passion, gyda Cherddorfa Oes yr Oleuedigaeth, oedd y tro cyntaf i'r campwaith mawreddog hwn gael ei glywed yng Nghymru i gyfeiliant cerddorfa gyfnod. Bu'r perfformiadau o Johannes-Passion Bach a'i Offeren yn B Leiaf, Gosber 1610 Monteverdi, King Arthur Purcell, Messiah, a nifer o offerennau hwyr Haydn hefyd yn torri tir newydd, gan eu bod i gyd i gyfeiliant cerddorfeydd cyfnod.
Ym mhen arall y sbectrwm hanesyddol, derbyniodd perfformiad y côr o'r Gosber gan Rachmaninov, y cyntaf gan gôr o Gymru, ganmoliaeth aruchel. Mae'r côr hefyd wedi perfformio llawer o weithiau o'r ugeinfed ganrif, yn cynnwys cyfansoddiadau pwysig gan Pizzetti, Frank Martin, Howells, Britten, Duruflé a gweithiau gan nifer o gyfansoddwyr o Gymru.
Cysylltiadau
Y Cyngerdd Nesaf
JESU, MEINE FREUDE
Nos Sadwrn, 17 Mawrth 2012, 7.30pm. Eglwys y Santes Fair, Abertawe.
